政情：公民講場：堆填區耕田 盲毛亂咁噏

今年施政報告預留咗十億元，資助七個已修復嘅堆填區發展康樂設施或其他創新計劃，立法會環境事務委員會尋日討論有關建議時，外號「正盲毛」嘅公民黨議員毛孟靜發表偉論，一時建議當局將已修復嘅堆填區轉做耕種用途，一時又提議拎嚟做小販跳蚤市場。環保署代表聽到有關建議當堂面有難色，好厚道咁話有關土地唔係好適合耕種，又指有關地段遠離民居，地勢偏僻，做小販跳蚤市場都唔係好啱。梗係喇，堆填區即使經過修復，地底嘅垃圾仲要經過好一段時間先完全淨化，又有臭味，又有沼氣，喺嗰度種出嚟嘅農作物，真係搵鬼食咩！