有人嘅地方就有是非，官場更係是非集中地。宣布提早退休嘅「AO歌王」民政事務局常任秘書長楊立門，尋日趁退休前同傳媒茶敍，盡訴心中情。對官場盛傳佢同政務司司長林鄭月娥不咬弦，楊立門聲稱呢個只係誤會，但承認兩人當年喺發展局共事，曾經頗激烈咁嘈過一、兩次交，但係佢形容兩人只係對工作上嘅問題有唔同意見，唔稱得上係不和喎。
不過，當講到佢現任老細民政事務局局長曾德成時，楊立門就大讚對方信任下屬，識得「抓大放小」，佢同曾德成相處得好好，相反林鄭嘅處事作風就係「大細都抓」，即係咩都攬上身。咁都唔叫不和？楊立門真係厚道囉。
早前政界有傳楊立門提早退休，係為咗幫前財政司司長梁錦松備選特首，楊立門強調自己唔識助選，亦完全無咁諗過，反而佢想喺退休後認真發展歌唱興趣，包括幫人唱歌籌款，甚至考慮將唱歌發展為第二事業。楊立門除咗唱歌好聽，原來仲識得即時傳譯，退休後會申請政府臨時工做即時傳譯員。