政情：網民探偲嫣 野餐「聲援」
親建制組織「正義聯盟」召集人李偲嫣，前日開始喺政府總部對出進行無限期絕食，抗議針對新界東北撥款嘅暴力衝擊行為同政府嘅軟弱回應。估唔到李偲嫣一個人絕食，比起早前有十幾人參與嘅泛民普選絕食團回響仲大，尋日絕食行動展開唔夠廿四小時，已有一批網民去咗「探望」同「聲援」佢。呢班十幾歲嘅網民仲好有「禮」，冇話兩手空空咁探人，帶晒薯片、汽水等去「野餐」，仲送咗支忌廉汽水畀李偲嫣飲，期間一度驚動警方到場維持秩序，唔知想攞景定贈興。
「最多餓死 唔會被激死」
李偲嫣就話，絕食一日後覺得有啲攰，腰痠骨痛，又指政總外面好多蚊，瞓覺時覺得個地下好硬，反應都慢咗。不過佢尋日就成功爭取到日本電視台NHK，專程派員嚟訪問佢絕食嘅心路歷程。對於班網民搞野餐嚟玩佢，佢就揚言自己最多絕食到死，但「我唔會畀人激得死！」有網民又翻李偲嫣舊帳，話佢喺兩年前公開鬧過班反國教示威者搞絕食，強調「此風不可長」，李偲嫣解釋話，當時佢係不滿班反國教人士煽動啲學生哥絕食，同佢作為一個成年人自發絕食唔同喎。