政情：浸大校長滋難而退?
一直大鑼大鼓為浸會大學爭取九龍塘李惠利用地嘅浸大校長陳新滋，尋日突然宣布明年六月底約滿後退休，換言之塊地都未到手，做咗一任校長就同浸大講再見，令人懷疑佢係以約滿退休代替搶地失敗辭職嘅承諾。不過據聞陳新滋私底下堅稱今次決定同李惠利用地無關，佢喺畀師生校友嘅電郵中進一步話呢個決定並唔容易，自己明年就年屆六十五歲，聽取家人意見後選擇退休，加上浸大發展已上軌道可以安心引退，重拾佢醉心嘅科學研究喎。
曾言搶唔到就辭職
回想當日，陳新滋就李惠利用地擬改做住宅用途同政府隔空開火，仲揚言如果浸大爭唔到塊地就會辭職，此言一出一度令唔少浸大人覺得校長好有承擔，但政府、學界就認為佢有啲夾硬嚟，事關塊地雖然好近浸大校園，但無人話會順理成章畀浸大，經過一輪抗爭後，城規會最終決定唔更改土地用途，將個波拋返畀教育局話事，教育局就講明李惠利用地可以用嚟做特殊教育，死都唔肯歸浸大擁有。
事情發展到今日，浸大要攞到塊地可以話難過登天，要起中醫教學醫院嘅計劃，隨時胎死腹中，雖然陳新滋私底下同浸大同事講，今次決定同李惠利無關，不過連浸大學生會會長陳天俊都疑似唔信，直言話兩者好難話唔關事，又爆料之前已收到風話陳新滋唔做，所以對陳約滿退休都唔會太意外。
浸大校董會主席鄭恩基對於陳新滋離任感到可惜，但表明會尊重佢嘅個人意願，校董會決定成立一個聘任委員會全球招聘新校長，又會邀請學生會代表和校友會代表會面，定期公布招聘進展。話時話，陳新滋爭取李惠利用地功敗垂成，終告約滿退休離場，唔知佢會否忠告繼任人，第日想搶地時要停一停，諗清楚先去做呢？