中環出更：玩足十一年 盛智文話未夠喉
政府規定任何人出任同一公職一般最多六年，有時破例委任多一、兩年都會畀人鬧，但偏偏海洋公園主席盛智文做足十一年，大家都好似冇乜意見。尋日佢同傳媒舉行告別午宴時，就直言自己仲未做夠，喺兩個月前收到不獲續任嘅消息後，初時有啲傷感，但佢亦明白政府做嘢要有規有矩，再唔「換血」好難向其他公職人士交代，唔覺有關決定涉及政治因素。
難忘着高跟鞋跳舞
盛智文指出，海洋公園全年入場人次，由佢喺○三年初上任時嘅三百萬人，上升至去年嘅七百七十萬人，令佢感到好驕傲，但佢警告目前市場有好多競爭者，因此佢卸任後會以顧問形式繼續服務海洋公園，確保新建嘅酒店項目同水上樂園順利完成。對於有傳政府想搵佢接任西九管理局主席，盛智文就話無收過邀請，就算有都要諗清楚，因為呢份工涉及好多財務同政治因素，仲難做過海洋公園。
盛智文上任初年常扮鬼扮馬幫海洋公園宣傳，而贏得「扮嘢文」外號。佢自言最難忘係扮女人着高跟鞋跳舞，跳咗十分鐘就已經頂唔順話攰，自此明白女人之苦；另一次佢着住套西裝扮跌落水，然後畀隻海豚救番上岸，雖然搞到成身濕哂，但佢亦樂此不疲。
卓妮