荷蘭首名出線
今日凌晨B組尾輪賽事，「橙衣軍團」荷蘭在射手尹佩斯缺陣下攻力受削，幾經辛苦以2比0險勝智利，並力壓對手以首名出線，於16強好大機會避開東道主巴西。至於肯定出局的上屆盟主西班牙靠昔日黃金拍檔韋拿及費蘭度托利斯各建一功，加上桑馬達攻入一球，以3比0擊敗澳洲攞番個尾彩。
雖然兩軍都想爭首名，希望在16強避開好大機會以A組首名出線的東道主巴西，但荷蘭明顯受困於隊長兼射手尹佩斯停賽，又未有派出另一中鋒亨特拉爾，只靠洛賓在前場單打獨鬥，攻力的確不夠銳利，令智利敢於壓前進攻，開波初段有菲臘比古迪利斯接應角球射高。
不過荷蘭逐漸企穩陣腳，35分鐘洛賓罰球斬入禁區，中堅迪維積衝頂高出，其後智利再有菲臘比古迪利斯在無人看管下卻頂出界，半場互無紀錄。
西班牙炒澳洲攞尾彩
下半場智利依然控制戰局，64分鐘阿歷斯山齊士於左路底線「通坑渠」過了謝明蘭斯抽射，但角度太窄遭荷蘭門將施利臣撲出，之後「橙衣軍團」換入上仗對澳洲奠勝的新仔迪比加強攻力，77分鐘另一後備球員利萊費亞率先接應罰球勁頂破網，接着迪比於補時階段建功，最終荷蘭擊敗智利，並以3分力壓對手以首名資格殺入16強。
同時間舉行的另一場B組賽事西班牙對澳洲，已宣告衞冕失敗的西班牙一如所料派出副選落場，連拿代替卡斯拿斯把關，艾比奧爾、佐治高基、韋拿及費蘭度托利斯亦以正選姿態上陣，結果由韋拿上半場36分鐘接應右路傳中「後踭」射入，費蘭度托利斯換邊後攻入一球，加上桑馬達錦上添花，西班牙終以3比0勝出，避免包尾出局，澳洲則三戰全敗敬陪末席。