考吓大家，做消防員有咩基本條件？體格強壯、有正義感、無不良嗜好？咁你就out嘞！今時今日要做個「合格」嘅消防員，除咗上述條件，仲要話頭醒尾，侍候好老細。
唔好以為功夫茶亂噏，消防處處長陳楚鑫提早退休，向來鍾意搞「歡送大龍鳳」嘅消防處，尋日喺沙田消防局為佢舉行「退休騷」，節目包括學員步操及模擬救火表演等，處長同一眾高層梗係睇到拍爛手掌啦，難為班學員喺雷暴警告下冒雨表演，又狼狽又危險，搞到怨聲載道。正如有消防員投訴，處方為討好新舊處長，罔顧前線員工安全，涉嫌違反安全條例。
更離譜嘅係，為接待來賓，沙田消防局附近嘅小瀝源消防局變身臨時停車場，班消防員就唔得閒咯，有人忙於指揮，有人要為嘉賓擔遮，有人仲要代客泊車添。消防員淪為斟茶遞水嘅「阿四」，都唔知好嬲定好笑。
話時話，消防官僚為咗擦鞋，無所不用其極，甚至不惜公器私用，早就唔係新聞咯。就講「退休騷」吖，本報早前踢爆處方用新型消防車參與綵排，反而從隔籬局借調老爺車執勤；仲有吖，前任消防處長盧振雄退休前搞咗場告別座談會，同樣係出動大型消防車做活動布景板。你話嘞，救火設備淪為表演道具，係咪攞市民生命安全較飛吖。
真係諗極都唔明，陳楚鑫領導無方，消防處喺佢任內醜聞多多，集體秘撈呀，打壓傳媒呀，消防局內開party呀，烏煙瘴氣，亂象叢生。早前仲畀審計署總結出十宗罪，「榮休」肯定冇份嘞，「辱休」就差唔多，照計應該低調走人，家陣反而唱通街驚死冇人知，簡直唔衰攞嚟衰。呢，可能佢自己知自己事啩，退休前同傳媒茶敍，竟然要求記者事先畀定問題處方過目，你慌唔係想砌定標準答案遮醜咩，又要威又要戴頭盔，真係笑大人個口！
講開又講，「歡送大龍鳳」已經成為消防處嘅獨特文化，警隊、入境處、海關同懲教署等其他紀律部隊從來唔興呢一套。好似警隊「一哥」退休咁吖，只係舉行簡單告別檢閱儀式咋嘛，唯獨消防處次次都要做一場大龍鳳，試問佢哋何德何能呢？唔通消防官僚真係高人一等？
即係咁，如果消防處係私人企業，話之你處長退休筵開二百席請通街，冇人會出聲。之但係涉及公帑就唔同講法喇，正所謂取之於民，用之於民，高官攞威納稅人埋單，點都講唔通。嗱，將毛伯伯兩句詩送畀陳楚鑫就啱嘞：「借問瘟君欲何往，紙船明燭照天燒。」