政情：公民講場：唔識寫「驚」字 侯志強求教

立法會財務委員會審議新界東北發展區前期工程撥款未解決，喺事件上從未見影嘅上水鄉事委員會主席侯志強，尋日就失驚無神帶埋近百名村民，到立法會「踩場」聲援支持新界東北發展陣營，更以「三軍未動、糧草先行」形容工程前期撥款，話一日撥款未批，受影響村民都得唔到賠償。咁難得由上水出城，怕唔怕同示威者衝撞會撞親自己呀？向來語出驚人嘅侯志強豪言：「我五十幾歲人，都唔識寫個『驚』字，如果你識，唔該你教吓我！」不過，相信「快閃」呢兩個字佢合埋眼都識寫，事關佢哋一行人逗留咗個幾鐘就鬆人，趕住去食飯喎。