政情：阿松倡內地孤島建港焚化爐
立法會財務委員會審議新界東北發展前期工程撥款「拉布」戰持續，而議會外連續三個星期五都有人示威及衝擊，令撥款一拖再拖。前財政司司長梁錦松就有新思維，尋日佢出席一個研究會時話，香港面對土地不足，如果強行改變土地用途，又或開發郊野公園土地的話，會好難做到，所以最好係同內地合作，開發珠海土地或內地孤島供港人使用，用作興建新市鎮或焚化爐等設施，咁港府就唔使成日同立法會爭鬥喎。
阿松仲叫港府同港人都應睇遠啲，港人唔應該淨係諗喺香港工作，而要放眼世界，積極面對全球化趨勢。阿松話，喺國家開放之時，港人若提出本土化就最弊，因為本土化完全冇道理，又話如果香港故步自封，上層冇得創業，下層又點會有工開吖。
稱港英時代冇咩好
至於講起中港矛盾問題，阿松就爆咗一句話：「港英時代冇咩好，青年人唔知道，但我知道」，莫非阿松知道港英政府有好多唔好嘅嘢？