今屆區議會同立法會選舉曾傳出種票醜聞，選舉事務處於是嚴打用假地址或選民資料不符嘅個案，免得被人質疑選舉事務處助長種票行為。本身係教育界選民嘅立法會議員黃碧雲（一舊雲）尋日投訴，收到選舉事務處職員通知，話要取消佢嘅教育界選民資格，改為俗稱「超級區議會」嘅區議會（第二）功能界別選民，激到佢紮紮跳。
一舊雲話，選舉事務處職員尋日打畀佢，話早前寄過信畀佢，叫佢回信確認選民登記資格，但就遲遲未收到佢回覆，所以對佢喺教育界嘅選民資格產生懷疑。該職員又話，該處已經向一舊雲任教嘅理工大學查詢，校方話一舊雲並唔係佢地嘅職員，所以決定取消佢嘅選民登記資格。
一舊雲就即時發火，話自己好似收過選舉事務處嘅信件，但最後唔知點解無回覆，批評對方無理取消佢嘅選民登記資格並不合理喎。被問到點解理大話一舊雲冇喺大學任教，一舊雲就大叫：「係人都知我喺理工教書啦！選舉事務處有乜理由唔知呀！」乜真係咁多人識佢咩？最弊係理大都唔知有佢呢位職員呢！