立法會工商事務委員會原本計劃八月去以色列訪問六日，睇吓當地創新及科技發展嘅經驗，但聽聞最近多位建制派議員因唔同原因想打退堂鼓。有議員解釋話要跟另一個代表團去北歐，有議員就話要開會，亦有女議員話因為老公擔心而唔想佢去咁話。議員平時藉外訪「遊埠」就爭崩頭，依家忽然又唔去，都唔知係咪見中東局勢緊張而縮沙。
除咗早已表明無意參加嘅委員會主席方剛外，副主席蔣麗芸（Ann）亦都因為想跟另一個代表團去北歐而縮沙。
我哋之前都問過阿Ann，佢話應該唔去以色列，但就有意叫埋老公梁海明齊齊去北歐，想喺外訪前後玩幾日。佢仲話最多放棄由立法會資助外訪費用，自己畀錢公幹喎。
本來議員鍾樹根同葛珮帆（EQ）會代阿Ann出征以色列，但樹根就話八月要去澳洲開會分唔到身。而EQ亦都心大心細，皆因佢丈夫擔心以色列因為中東局勢緊張而有危險，認為做議員唔使搵命博咁話，所以佢都仲要諗吓先喎。