政情：盛智文隨時雙失

入西九董事會將滿6年

西九管理局董事會現有十五名非官方董事，大部分去到今年十月就做夠六年，根據政府委任公職人士嘅「六六規定」，理應全部卸任換人，僅餘下孔令成、蔡永忠及葉傲冬等幾名較新委任嘅董事。為免一次過換太多人影響西九工作嘅延續性，再加上西九最近接連爆出工程超支及延誤醜聞，政界盛傳專責西九財務嘅夏佳理、專責選購藝術品嘅羅仲榮、以及被指係隔代西九主席嘅盛智文，將可獲破例續任多一至兩年。

不過，近日又有消息指出，政府內部突然決定為西九進行大換班，連盛智文等人都冇得留低，至於背後原因就眾說紛紜。有說呢個安排係西九管理局主席兼政務司司長林鄭月娥嘅決定，話佢覺得冇人係唔可以被取代嘅，政府應該依足規矩嚟做，夠六年就換人；但亦有傳因為夏佳理、羅仲榮同盛智文都係「唐營」人士喎。其實新政府上場後，獲委任或續任重要公職嘅「唐營」人士，可能仲多過「梁粉」，有關說法真確性令人存疑。

孔令成坐正掌海洋公園

講番海洋公園嘅新任命，除咗孔令成坐正主席之外，政府又委任咗現任海洋公園董事劉鳴煒做副主席，信和置業執行董事黃永光及康泰旅行社董事總經理黃進達就做新董事。而海洋公園亦於同日宣布，將會考慮委任盛智文做榮譽顧問，參與佢喺任內跟開嘅大樹灣水上樂園發展項目督導小組工作，繼續為海洋公園服務。所以如果盛智文真係冇得再做西九董事，都未至於乜都冇得撈嘅，只係並非話事嗰個啫。