中環出更：暗寸星爺 卿姐大晒威水史
立法會財務委員會討論新界東北發展區前期工程撥款爭議沒完沒了，似足一○年高鐵撥款「翻版」，立法會議員劉慧卿當年時任財委會主席，主理高鐵撥款，亦夾喺泛民及建制兩大陣營中間慘成磨心。不過，卿姐尋日主持網台節目重提當年辛酸史時竟講到威水史咁，暗批現任財委會主席吳亮星（星爺）主持會議冇料到。
斥無做好溝通
卿姐尋日個節目係討論立法會處理新界東北發展項目爭議，講起星爺擬強硬「剪布」中止辯論，卿姐就重提當年同時任運輸及房屋局局長鄭汝樺有商有量，開足十四節會議畀議員問到夠，先至表決通過撥款申請，擺明暗寸星爺同政府、議員冇做好溝通，落得今日如斯田地。
話時話，當年高鐵撥款一役，官員同議員要漏夜由數百警員築成人鏈護送下才能成功離開立法會，仲要乘搭港鐵尾班車離開。所以話呢，如果官員同受影響市民溝通得唔好，無論官員同議員喺議會內溝通得幾好都冇用。
卓妮