中環出更：示威頻頻 工總CEO頭痕
近期香港示威抗議活動經常發生，而且愈來愈激烈，令到保安行業需求急增。早前中華廠商聯合會常務會董兼「家電大佬」陳國民為旗下電器集團九龍旗艦店開幕，包括香港工業總會主席劉展灝（Stanley）、副主席鄭文聰等工商界翹楚齊去捧場。據聞下月工總將喺灣仔會展舉行周年會員大會，會展方面唔敢掉以輕心，要求工總增聘保安嚴防騷亂，令負責籌備嘅工總行政總裁蘇家碧好頭痕。
聽講今個月初香港總商會喺會展舉行換屆周年大會時，亦遇勞工團體示威，先至令會展咁緊張。鄭文聰就話，Stanley係勞工顧問委員會成員，經常公開發表意見，佢都擔心勞工界會有誤解，到時會去踩場。話時話，近日謠傳有護衞公司以時薪一百二十元至二百多元急聘保安員到立法會執勤，雖然最終證實係虛構，但正反映保安業需求大增，唔知到時工總夠唔夠人手應付呢？
卓妮同場仲見到古董收藏家黃經國，佢話早幾年內地新興富豪搶貴晒古董價格，但中央持續打貪，已令古董市道變得冷清，近期拍賣行嘅流拍比率高達四成，價格亦回落近半。雖然市道急降溫，但佢認為都係件好事喎。
劉燊濤為睇波寧瞓廳
Stanley嘅囝囝劉燊濤（Gary）都有到場，最近世界盃賽事進行得如火如荼，身為超級足球迷嘅Gary自然忙到日夜顛倒。佢笑稱，晚晚校定鬧鐘凌晨三點鐘起身睇波，為免嘈醒太太，佢甘願晚晚做「廳長」。唔少醫生溫馨提示捱夜睇波小心肝火盛，Gary就冇有怕，事關佢有媽媽煲嘅竹蔗茅根水幫手清熱喎！
卓妮