英格蘭執包袱
「三獅兵團」提早拜拜！今日凌晨「死亡D組」次輪賽事，意大利倒灶以0比1不敵哥斯達黎加，後者兩戰全勝率先殺入16強，意大利要在最後一仗與同分的烏拉圭爭餘下一個出線席位，零分的英格蘭宣布提早出局。
賽前意大利前鋒巴洛迪利的經理人拉奧拿與AC米蘭高層加利安尼會面，商討巴神今夏可能離隊轉投阿仙奴一事，不過加利安尼揚言至少要3,700萬鎊現金至有得傾。今仗意大利有門將兼隊長保方復出，30分鐘巴洛迪利獲得一次快速反擊，趁哥斯達黎加門將基羅拿華斯出迎前輕輕一挑可惜斜出。完半場前祖利亞戴亞斯左路傳中，靚仔前鋒拜仁雷斯勁頂中楣彈入，加上「門線技術」亦確認入球有效，令哥國意外地領先一球返更衣室。
哥國率先入16強
下半場意大利主帥柏蘭迪利換入卡斯辛奴加強攻力，亦是這位老將職業生涯首場世盃賽事，52分鐘中場指揮官派路妙射罰球彎過人牆，又過不到基羅拿華斯的十指關，之後意大利大舉反撲，可惜都未能攻破哥軍的密集防線，最終以0比1敗陣。
哥斯達黎加今仗贏波後累積6分率先殺入16強，由於同組的英格蘭昨日凌晨以1比2不敵烏拉圭，兩戰全敗排包尾，後者與意大利一樣手握3分，尾輪意、烏互撼肯定有一隊會搶到分，就算英格蘭最後一仗擊敗哥斯達黎加都只得3分，一定未能超越意、烏，換言之「三獅兵團」宣布提早出局。