廉政公署幾年前有個廣告係咁嘅︰一班老人家喺茶樓話當年，有人慨嘆細個雖然窮，但玩吓丫叉打吓波子又一日，不知幾寫意。有人反駁指，唔係乜嘢都係舊時好嘅，如果洗黑錢鹹水樓返番嚟，大家仲邊有得歎茶咁梳乎吖？嗱，呢個廣告真係一語成讖，香港貪污愈嚟愈嚴重，廉潔社會睇怕就快變集體回憶咯！
唔係功夫茶危言聳聽。廉署委託研究機構進行嘅民調顯示，近三成受訪者認為香港貪污普遍，一成七甚至認為未來一年本港貪污情況將會增加，比率創四年新高。最得人驚嘅係，近兩成受訪者認為「政府高官/公務員/政府都涉及貪污」。「香港勝在有ICAC」，吹水唔抹嘴，唔通真係此情可待成追憶？
又難怪市民冇信心嘅。近年高官貪腐醜聞不絕如縷，先有前特首曾蔭權爵士貪遍省港澳，官商勾結，利益輸送，後有前廉政專員湯顯明貪威識食，濫用公帑，前者成為第一個被調查嘅特首，後者就成為第一個被調查嘅廉政專員，簡直係一丘之貉。有人形容香港喺貪腐方面已經同內地「一國一制」，真係一啲都冇誇張。
正所謂，上樑不正下樑歪。做大嘅其身不正，又食又拎，做細嘅自然有樣學樣喇。呢，官員呃津貼有之，開位畀自己友者有之，用公帑擦老細鞋有之……簡直係烏煙瘴氣，亂象叢生。冰凍三尺，非一日之寒，香港廉潔形象每況愈下，早就臭名遠播。有國際組織今年初調查發現，本港廉潔評分喺亞洲排名第四，畀排第一嘅新加坡遠遠拋離。而本港喺全球廉潔指數排行榜嘅排名更係跌跌不休，咪話唔得人驚。
講開又講，香港廉潔招牌固然搖搖欲墜，另一引以為傲嘅法治精神，亦唔好得幾多。今時今日香港社會日趨政治化，爭拗無日無之，而且愈來愈激添。嗱，立法會今日又傾新界東北前期撥款啦，隨時又搞出個大頭佛，問你怕未。
都係古人講得啱，百年養不足，一日毀有餘。香港辛辛苦苦建立嘅廉潔聲譽，喺貪曾集團一再摧殘下已經蕩然無存。正如有學者話齋，想重新提升本港廉潔形象，現任廉政專員白韞六應該吸取教訓，「做得好一啲」，特別係盡快完成調查雙貪案，懲處應該受懲處的人。
係呢，聽講廉署已經將雙貪嘅罪證及調查報告轉交律政司審議，即係話短期內有人可能難逃法網。計功夫茶話齋，講多無謂，行動最實際，絕代雙貪案都查咗咁耐咯，係時候抬出狗頭鍘嘞啩！