立法會財務委員會今日下午再開會審議新界東北發展前期工程撥款申請，經過上星期五開會發生示威者衝擊立法會事件，立法會主席曾鈺成尋日同行政管理委員會開會後宣布「投降」，話現時立法會保安人數同設備都不足以應付大規模衝擊，所以要將原本嘅示威區遷移去出面嘅行人路。曾主席坦言，鐵馬無法阻擋示威者，又冇設施保護玻璃幕門及在場人士嘅安全，總之講到立法會大樓好似豆腐咁，篤一篤就散晒。其實今次事件的確暴露立法會大樓唔少漏洞，秘書處真係要趁暑假諗辦法搞搞佢喇！
