政情：何永謙用番原名「海明」
娛樂圈不時有明星改名轉運嘅例子，點知呢股改名風吹到去政界，今次主角係前衞生及福利局副局長何永謙（Laurence）。Laurence於去年四月底獲委任為新一批市建局非執行董事，及至最近有人發現Laurence喺市建局最新嘅利益申報中，佢嘅英文姓名譯音為何海明，連同最近佢喺報章撰文時署名都用「何海明」三個字，並加上括號標明何永謙屬前名。
Laurence接受查詢時證實改名一事，透露「何永謙」係讀書時代嘅名，至於「何海明」係爸爸以前改落嘅名，身份證都係「何海明」個名，原本打算長大後出外工作時用，只係一路用開「何永謙」個名就冇再更改嘞，佢笑言依家係半退休狀態所以用番「何海明」個名，方便身份證同銀行戶口統一名字。
對新舊名冇偏好
至於何海明嘅由來，Laurence話佢喺家族屬於「海」字輩，又對新舊名冇特別偏好，自言大家一向叫開Laurence，如果叫番佢原名都會睬大家喎。