政情：港大民研不能說的秘密?

容易受傷嘅港大民意研究計劃遭黑客入侵已經唔係第一次，好似前年三月舉行「民間全民投票」網上選特首，就因為手機程式同網站雙雙遭黑客攻擊以致網絡癱瘓，結果逾八萬市民要改到實體票站投票。除咗港大，唔少泛民團體同媒體都不時報稱遭受網絡攻擊，但事件往往不了了之，破案無期。

投票延長 泛民政黨不滿

有消息就爆料話，警方唔係「揸流攤」冇盡力調查，但過去幾次向港大等報案人索取電腦文件同資料，對方都拒絕合作，警方亦奈佢哋唔何。究竟係泛民團體信唔過警方，抑或佢哋有不可告人嘅秘密，真係不得而知喇。我哋曾經嘗試聯絡港大民研總監鍾庭耀但未有回覆。

為對付黑客攻擊，港大日前公布延長實體票站投票日期至廿九日，即共十日，但據聞有泛民團體同政黨私底下對安排有微言。有團體認為，投票日原定廿二日結束，即使翌日公布投票結果，佢哋都有成個星期時間畀政府回應，兼為七一遊行造勢谷人數。但廿九日先結束投票，三十日公布結果，第二日已經係七一遊行，變相中間冇機會畀佢哋「抽水」造勢，擔心影響遊行人數喎。

另外，佔中秘書處有意向「同路人」團體招手，加開實體票站進一步催谷投票人數，多個泛民團體一呼百應，單係民主黨就擬開放黨內全數六十幾個議員辦事處供市民投票。不過，據知鍾庭耀擔心票站欠監察會容易「出事」招話柄，所以多個有意開放嘅票站，都要經鍾庭耀逐個審批，最終能唔能夠做到「遍地開花」實在好難講。