香港進入多事之秋，風雨不停，爭拗不絕，連內地活雞幾時恢復供港亦各有各講，正式係家嘈屋閉，雞犬不寧！
件事係咁嘅，今年二月本港驗出內地活雞感染禽流感，當局殺咗二萬幾隻雞，並宣布停止輸入內地活雞四個月。眨吓眼限期明日就屆滿嘞，究竟點樣安排，係咪恢復輸入內地活雞，當局遲遲冇交代，搞到業界無所適從，怨聲載道。呢，尋日有幾十名批發商、運輸商及雞販代表到長沙灣家禽批發市場門外示威，有人仲爬上棚頂抗議，要求當局解釋並立即開放內地活雞來港。
又難怪業界咁勞氣嘅，要求約見食衞局局長高永文被拒，要求食環署官員交代又冇下文，佛都有火喇。內地活家禽批發商會會長徐名團係咁講嘅，業界已聯絡內地檢疫部門，確認供港雞隻全部安全合格，本港批發商已準備就緒，並向內地訂雞，每日七千隻料本周五可供港，屆時雞隻批發價可由現時最高每斤四十一元回落至二十幾元咁話。而食衞局嘅講法又唔同，聲稱幾時恢復內地活雞供應係內地商業決定，目前內地質檢部門及供港雞場正準備檢疫安排，暫未有恢復供港嘅確切日期，待內地當局確認日期後，會盡快公布具體安排喎。
好明顯，港產官僚唔係玩緊拖字訣，就係敷衍塞責。佢哋明知停止輸入內地活雞期限幾時屆滿，點解唔早啲同內地溝通，而要搞到依家仲要待內地當局確認日期呢？講到底，多做多錯，少做少錯，唔做唔錯，港府根本唔想輸入內地活雞，但又唔敢面對業界，咪惟有拖得一日係一日囉。高永文曾經講過，香港仍會持續受到禽流感威脅，並要以較高嘅代價及資源去維持本地及內地兩個高風險供應鏈，社會係時候反思，係咪要繼續保留活雞供應。
即係咁，高永文呢番說話雖然為咗卸責，但本港近年多次殺雞都杜絕唔到禽流感，的確係事實，如果恢復輸入內地活雞咯喎，邊個敢保證唔會再出事吖？講來講去，都係前朝政府尤其係前食衞局局長周一嶽累事，當初係威係勢研究中央屠宰，點知最後無疾而終，搞到爆發一次禽流感就殺一次雞，納稅人固然要負責埋單，而業界亦冇啖好食，簡直係害人害物。
無論點都好喇，既然停止輸入內地活雞限期已滿，究竟係恢復供應，抑或另有安排，當局都應該盡快向業界及市民交代，拖字訣唔係辦法。咪話功夫茶唔提醒，香港已經夠亂，有人攻佔立法會，有人準備佔領中環，如果當局再激嬲家禽業界點多個火頭咯喎，盞唔衰攞嚟衰嘅咋！