越南早前爆發反華示威，唔少中國以至香港廠商都受牽連，工廠都要停工，部分廠商就決定「另起爐灶」。一向關注緬甸發展嘅立法會紡織及製衣界議員鍾國斌（Felix），上星期就率先帶同十幾個廠家去緬甸，簽訂買地合約，連緬甸華人首富潘繼澤（Serge Pun）及香港駐新加坡經濟貿易辦事處處長方毅都現身見證簽約儀式。
Felix話，呢幅地位於仰光，有四十萬平方米，地價三千萬美元，最快今年底交吉，再多半年就起晒廠房投產。佢透露，最少有三個香港廠家本來想去越南發展，依家都改去緬甸開廠，加上緬甸人工平越南三分之一，實在好吸引。佢哋仲買咗另外一幅有一百二十萬平方米嘅土地，Felix會有份喺度開廠，唔少國際品牌已搵佢介紹廠家。
至於Felix一直關心嘅緬甸傭工，似乎就無疾而終，皆因首批近二十名緬傭，來港後似乎唔係好習慣城市生活，而好多香港中介公司好「狼胎」收取二萬六千港元中介費用，比菲律賓同印尼多一倍，加上有印傭Erwiana被虐事件，緬甸勞工部決定謀定而後動，做好配套先放人去香港打工。