政情：大舊慢必從「鐘」作梗
立法會財務委員會（財委會）明日將會繼續審議新界東北發展前期研究撥款申請，正當泛民主派考慮緊會否加入戰團幫手「拉布」時，人民力量議員陳偉業（大舊）同陳志全（慢必）已率先決定將行動升級，尋日嘅立法會大會上向政府同建制派全面開戰，瘋狂連環要求響鐘點算法定人數超過二十次，除咗玩殘一班建制派議員要行出行入外，一眾高官亦等了又等。
要呢幾個月冇得好過
雖然立法會大會同財委會完全係截然不同嘅會議，但大舊同慢必就一於少理，喺下晝開始不斷要求主席曾鈺成點算開會法定人數。佢哋兩人響鐘都有特別策略，就係趁班議員出去食飯時要求點人數，甚至等啲議員入去湊夠人數後行返出會議廳時，又再要求點人數，總之就係要建制派議員行出行入，有氣無碇抖咁話。
慢必投訴新界東北發展爭議性大，民意反彈更大，但政府仍然霸王硬上弓，更聯同財委會主席吳亮星（星爺）夾計快快「剪布」，罔顧新界東北居民利益。大舊仲講明，話喺呢個幾月內唔會畀建制派好過，誓要將佢哋玩殘為止。
累高永文唔敢去食飯
有建制派議員批評兩人不斷響鐘係要不得嘅行為，認為如果兩人有其他更有建設性嘅建議，應該透過其他途徑提出，而唔係不斷做埋晒啲無聊行為，又批評兩人嘅講法係垃圾，如果因為佢哋點人數搞到不幸流會，人民力量要負上最大責任喎。咁啱香港研究協會尋日公布最新民調顯示，人民力量同社民連嘅評分插水最勁，協會估計係同佢哋「拉布」有關。
不過，大舊未玩殘建制派議員，就先令政府一眾高官疲於奔命。事關尋日會議頭兩小時係緊急質詢環節，討論立法會大樓保安問題，之後就輪到日常質詢，由各局長出席解答唔同議員關心嘅問題。喺呢個時候，大舊開始不停要求響鐘，搞到經常要暫停會議等齊人，而準備答問題嘅官員就要留喺會議廳入面呆等。
據聞食物及衞生局局長高永文坐喺會議廳前廳，由一點鐘等到三點鐘，又因為唔知幾時先輪佢，搞到唔敢去食飯，最後等到三點半鐘答完問題先可以急急腳去醫肚。商務及經濟發展局局長蘇錦樑原先諗住答完問題至去灣仔會展出席活動，點知最後去埋活動後仲有時間返立法會坐鎮，睇嚟一班局長尋日真係多得人民力量唔少囉。