中環出更：校鬧鐘睇波 象哥嘈醒老婆
巴西世界盃賽事愈來愈精彩，唔少立法會議員都寧願瞓少幾個鐘起身睇波。不過，進出口界議員黃定光（象哥）就自爆至今一場賽事都未睇過，皆因次次校咗鬧鐘都唔知醒，惟有睇番電視台重播精華片段就算嘞。
呼呼大睡冇睇到
象哥話，佢對西班牙隊情有獨鍾，適逢上星期六凌晨有場賽事係西班牙對荷蘭，象哥梗係非常興奮啦，仲決定校定鬧鐘三點鐘起身睇波。不過，當鬧鐘準時三點響起，象哥竟然繼續呼呼大睡，但係佢嘅枕邊人林淑儀就畀個鬧鐘嘈醒咗，象哥最後當然係一分鐘嘅賽事都冇睇過啦。
荷蘭最後以五比一大勝西班牙，作為荷蘭隊擁躉嘅工聯會郭偉強就開心到見牙唔見眼。佢話覺得荷蘭隊大勝係一個好兆頭，又話如果球員冇受傷患困擾，分分鐘會捧走世界盃喎。講到凌晨睇波有咩策略，郭偉強透露，佢每日只會睇一場賽事，一係就睇凌晨十二點嗰場，一係就晨早起身睇六點鐘嗰場。不過，佢前日原本諗住睇比利時對阿爾及利亞場賽事，但睇咗半場就頂唔順瞓着咗。
卓妮