今屆世界盃都幾過癮，兩場大炒都勢估唔到，兼且算反底。荷蘭炒西班牙五比一，是個人擊倒整體，尹佩斯加洛賓玩殘西班牙。但幾天後反底，輪到德國炒葡萄牙四比零，則是整體勝個人。
德國表現愈趨成熟，今屆看來正是這班黃金一代的最黃金時期，技術、經驗與智慧累積到相當程度，而體能仍足夠應付發揮。
葡萄牙的表現則更有啟發性，前面一個C朗，後面一個比比，敗陣似乎不只優勝劣敗咁簡單。
不知是看荷炒西看上腦，還是教練吩咐，有波要盡快傳給C朗，結果上半場其他球員該去不去，也不傳球其他位置更好的隊友，瞌埋眼便往C朗方向傳；C朗雖然扭得射得，但怎有可能下下都去；下半場勝負底定，真係行行企企等完場，葡軍球員不知傳球給誰，只能自顧自盤扭。這就像特區政府施政，邊個司長好打得，便樣樣關佢事，像政改、公民教育、土地發展、垃圾處理等等，到頭來得個走字，無腳好波。
比比平素在皇馬已是不定時炸彈，愛挑釁也容易被挑釁，所謂觀眾印象，也是球證印象，隨時要少踢一個；踢球會球員風格有市場價值，國家隊要讓這類球員擔大旗，領隊要考慮清楚。成功的領隊通常不會用駕馭不了的球員，像法國的迪甘斯，連拿斯尼都不要。特區政府，教育局、環境局、發展局，隨口噏都有不少局長屬不定時炸彈，未知幾時爆大鑊。可又未必是領隊的駕馭問題，特區現在的領隊也出名愛挑釁，根本連自己都是不定時炸彈。
有個好波球員，就乜波都交畀佢，到頭來只會打掉隊友信心；偏偏特區政府又不得不如此，只為太多局長未夠班。