中環出更：馬恩國爆粗罰做「釘牌大狀」一月
大律師馬恩國去年二月喺立法會一個聽證會上，因為以英文粗口鬧爆議員「長毛」梁國雄而遭投訴，大律師公會隨即對佢進行紀律研訊。研訊前後搞咗成年幾，馬大狀上周四終於收到公會嘅書面通知，判罰佢就「爆粗」事件停牌一個月，兼繳清研訊涉及嘅律師費用，相信十幾二十萬元一定走唔甩。馬大狀就自嘲即日暫改稱「釘牌大狀」。
自言「講嘢直咗啲」
雖然大律師公會一般裁決都設二十一日上訴期，馬恩國期間理應可以繼續掛牌執業，但佢表示尊重公會裁決，唔會主動提上訴之餘，更即日起自我「釘牌」，至八月初都會降呢做「釘牌大狀」，期間唔可以接受律師嘅轉聘個案，但相信對日後工作影響唔大。
移居澳洲多年嘅馬恩國，自言鬼仔性格「講嘢直咗啲」，以後講嘢會小心啲，唔再將情緒直接表現晒出來。佢仲引用近代詩句「人間正道是滄桑」來形容自己經歷，估唔到讀番書都識吟詩幫自己「贈興」。咁未來兩個月應該叫馬恩國做咩呢？佢話最近成立咗個中澳法學交流基金會，建議大家呢兩個月叫佢做基金會主席就得喇。
卓妮