中環出更：阿蘇被陳國民 搞大咗個肚
香港人生活節奏急促，樣樣都要快，工作壓力自然大。香港提升快樂指數基金有見近日社會負面情緒增多，日前舉行第二屆「開心工作間」，鼓勵公司為員工創造愉快工作環境。獲邀出席分享嘅商務及經濟發展局局長蘇錦樑（Greg蘇）就搞笑話，身兼基金會長嘅德國寶董事長陳國民介紹咗好多製作食品嘅電器畀佢，因而愈食愈多，令基金副主席鍾志平笑佢被陳國民搞大咗個「肚」喎。
社會爭拗不斷，做官如何保持心境開朗？Greg蘇話秘訣係要記住每日開心嘅事，例如每日睇吓孫女嘅相片同短片就會好開心。另外，唔同人哋比較亦係快樂之道，好似加薪咁，就算人哋加得多過你，總之你有得加都係值得開心，聽落有啲阿Q精神。佢仲話，好多人以為佢同下屬壓力好大，但其實佢哋會議室有好多陳皮梅同朱古力，開會時可以食嘢減吓壓。
莊偉茵：笑得多就靚
同場仲有中電企業發展總裁莊偉茵（Quince），雖然佢唔係基金成員，但因為有中電員工參加咗基金嘅攝影比賽獲獎，所以佢特別到場支持。經常笑容燦爛嘅Quince話，開心自然會笑，笑得多就自然靚，個人就會有光彩。佢又經常唱歌同運動，唔會刻意去諗唔開心嘅嘢。
楊志雄：愛行山減壓
基金副主席施榮懷致詞時都開玩笑話，陳國民在拍攝活動小冊子時木無表情，但參加咗計劃之後就同台上嘅基金主席吳宏斌一樣笑容滿面，證明呢個開心計劃好使得。另一副主席楊志雄就話，平時鍾意行山接觸大自然，遇到問題時唔好鑽牛角尖，向好嘅方面諗，就可以化壓力為動力喎。
卓妮