比利時反勝沙漠之狐

自2002年韓日世盃後再次踏足大賽舞台嘅比利時，賽前獲巴西球王兼「烏鴉口」比利大讚好波：「如果你未親眼睇過比利時的比賽，你永遠唔知這支球隊有多優秀。」今仗比利時有「小魔獸」盧卡古傷愈復出，拍住兩翼夏薩特同奇雲迪布尼搶攻，21分鐘韋素遠射被救出。

不過3分鐘後守將維頓漢於禁區內衝動拉跌阿爾及利亞中場菲侯利，球證毫不猶豫直指12碼，菲侯利親自操刀一射中鵠，意外地打開紀錄，亦係「沙漠之狐」28年來首個世盃決賽周入球。39分鐘維頓漢欲將功補過，可惜他罰球怒射高出，之後查迪尼入楔又太黐腳失機，令比利時半場以0比1落後。

今屆世盃第6場開反勝

易邊後比利時主帥韋莫斯先換入攻擊中場梅頓斯，希望盡快收復失地，但面對阿爾及利亞的嚴密防線，明顯老鼠拉龜冇碇埋手，其後韋帥放手一搏，換入奧歷治及費蘭尼加強攻力，67分鐘奧歷治半單刀快射被阿軍門將麥保希救出。直至70分鐘，奇雲迪布尼斬入禁區，由後備入場串演中鋒的「爆炸頭」費蘭尼迎頂破網扳平。比利時之後得勢不饒人，80分鐘另一後備兵梅頓斯接應夏薩特妙傳射成2比1，全取三分，總算冇畀比利的「烏鴉口」咒死，亦令今屆反勝賽事增至六場。