馬鞍山：砍樹亂擺行人路 「木」無法紀
木頭阻塞行人路，令行人無路可行。「無喇喇成堆樹就咁擺喺行人路，真係好阻碇，同埋政府點解要斬晒咁多棵樹，究竟有冇亂斬？」陳先生（化名）經常會途經馬鞍山恆德街，早前發現有大量被砍伐樹木遭置於行人路旁，惟附近未有張貼「斬樹」告示，擔心有樹木遭亂斬。
地署指搬走需時
地政署發言人表示，該署承辦商早前於上址砍伐共二十九棵有危險的樹木，由於被砍伐的危樹眾多，以致未能在砍樹當日清理所有枝幹，故有部分枝幹暫時遭放置在附近行人路旁，以免影響行人。承辦商於其後數日已將剩餘的枝幹全部運走，有關樹木為本港常見品種，包括台灣相思、大葉相思、耳果相思及白千層等。
「如果有危險斬樹係啱，但斬咗咁多棵樹，又就咁放喺行人路咁多日，係咪應該貼張通告話畀市民知發生咩事。」陳先生要求部門再進行類似工作時，可提供更多資訊予市民，以免造成誤會。