世界盃開鑼，香江全城進入睇波熱潮，球迷觀眾捱更抵夜，酒吧夜店座無虛席，最寂寞可能就係獨守空幃嘅足球寡婦。功夫茶身為標準球迷，對呢個四年一度嘅足壇盛事既興奮又惆悵，興奮係因為欣賞到全球勁旅同場較技，惆悵係聯想起香港足運一蹶不振，正一各國猛將滿巴西，香港斯人獨憔悴，點能夠唔令人神傷，點能夠唔令人慨嘆！
咁點解香港足球一沉不起呢？嗱，尋日有一單新聞，可能畀到大家少少啟發。話說消委會引述國際消費者組織嘅足球品質測試結果，喺本港有售嘅十款之中，有三款表現不濟，包括一款重量未達國際標準，一款防水效果評分最低，一款喺不同滑行速度下都受亂流影響，軌迹令人難以捉摸。睇到呢個測試結果，唔使問阿貴，港產官僚一定由心底笑出來喇，港鐵對新支線延誤賴天賴地，港府對本地足運衰落咪賴個波囉，足壇人才凋零？足運停滯不前？港足每況愈下？全部都唔關港府事，要怪就怪個波唔爭氣喇！
呢啲當然係晦氣說話，發展足運不同於發展娛樂事業，成敗興衰無理由繫於個波。咁究竟係乜嘢原因呢？第一個原因係體育界自己唔爭氣。曾幾何時，香港足壇人才輩出，勁旅雲集，一度成為戰績輝煌嘅亞洲足球王國，幾咁巴閉。可惜隨着歲月流逝，足球王國土崩瓦解，拚搏精神一去不返，家陣嘅香港足壇唔止係一潭暮氣沉沉嘅死水，更加係一潭假波醜聞不絕如縷嘅污水。呢，今年初之嘛，本地球會接二連三爆出球員涉嫌集體打假波醜聞，反映嘅已經唔係個別球會嘅衰落沉淪，而係香港足運嘅整體墮落。
至於第二個原因咯喎，咪就係港府冇做好自己份工囉。當局縮骨卸膊，推動體育發展只係得把口，任由足運自生自滅，關人個關，有乜可能唔人才凋零，前景黯淡吖。打個比喻吖，如果體育界係落場拚搏嘅球員，港府就係統籌指揮嘅領隊，家陣做領隊嘅翹埋雙手，又冇投放資源，又冇戰術規劃，淨係一味識叨運動員嘅光，球隊唔輸到灰頭土臉至奇喇。最好笑嘅係，當港隊喺○九年東亞運爆冷奪冠，當局為咗叨光而搞咗個「鳳凰計劃」，話資助港足發展喎，點知多年過去，足運非但毫無起色，反而仲不斷插水，國際排名跌跌不休，跌到阿媽都唔認得嗰隻，一句話，冇眼睇。
事實證明，港府就係嗰堆表現不濟嘅劣質足球，分量未達標，吹水成分高，唯一不同嘅係佢哋嘅行事軌迹一以貫之，做乜都求求其其，是是旦旦。
俗語話，波係圓嘅。香港足運沉淪已久，有冇機會鹹魚翻生，重振聲威，就睇體育界係咪可以知恥近乎勇，政府係咪可以奮發圖強嘞！