港大學生會尋日喺港大法律學院內嘅模擬法庭，搞咗場政改論壇，邀請咗「愛港之聲」召集人高達斌、學聯秘書長周永康同民主黨主席劉慧卿等擔任主講嘉賓，結果當然係互鬧收場。期間高達斌同周永康激辯乜嘢先叫做暴力，講到「以暴易暴」好似好合理咁，真係唔知邊個講嘅先啱。
話說高達斌帶咗十多名「愛港之聲」成員出席論壇，每當卿姐同周永康發言，佢哋都會噓聲四起，高呼歪理。期間有學生批評佢哋唔尊重其他嘉賓，唔畀唔同意見嘅人講嘢。高達斌就反駁，相對於反新界東北發展嘅示威者、一連兩個星期五佔領同衝擊立法會，佢哋只係口講口賠，冇郁手郁腳亦冇用到武器，可謂小巫見大巫。
周永康隨即再反駁高達斌，話示威者衝擊立法會，相對政府強行收地、建制派企圖強行通過新界東北發展撥款嘅「議會暴力」，又算得上係咩呢？可惜呢個模擬法庭冇法官亦冇庭警，到底邊個啱邊個錯，要讀者自行判斷嘞。