政情：立法歎慢板 港府拖字訣
經歷為期個多月嘅預算案拉布戰，立法會大會積累咗大量法案同議案有待表決，當中由勞工及福利局局長張建宗負責嘅男士侍產假草案，以及由保安局局長黎棟國負責、有關變性人結婚權嘅婚姻條例草案，立法會各黨派至今未能達成共識，據聞政府內部已對該兩條草案打定輸數，認為好大機會未能趕及於立法會七月暑假休會前三讀通過。不過，有說政府對呢兩條草案嘅態度係「你急我唔急」，一旦無法如期通過，損失嘅只係勞工界同少數有意正式結婚嘅變性人，大不了過埋個暑假再同立法會砌過，唔會為求趕暑假限期而輕易讓步喎。
消息指依家排緊隊等立法會大會三讀通過嘅法案堆積如山，政府內部都有先後緩急之分，當中最想盡快通過，當然係關乎樓市興衰嘅雙倍印花稅「辣招」草案。政府評估經歷上次買家印花稅草案，泛民扭擰一輪、最後被迫集體離場嘅鬧劇後，預計今次草案三讀會較少風浪，應可順利過關。
與政黨業界分歧仍大
相比之下，本來看似簡單嘅侍產假法案就波折重重，勞工界同泛民表明會提出修訂，將草案原訂只有三日嘅男士有薪侍產假增至五日或七日，以及將放假期間嘅工資由八成修訂為十足支薪，有一定機會通過分組點票。但當局認為三日侍產假，係經過勞工顧問委員會長時間討論而得出嘅共識，要推倒重來絕非易事。加上工商界近年喺最低工資、標準工時、輸入外勞、以至取消強積金對沖等問題上，多次覺得畀勞方同政府住嚟打，再讓步嘅機會微乎其微。因此若果當局發現真係數唔夠票，不排除會暫緩甚至收回整條草案，大輸家將會係等到頸都長嘅打工仔。
有關變性人結婚權嘅婚姻條例草案，各黨派與政府之間嘅分歧亦相當大，當局認為只有完成晒整項變性手術嘅變性人，先有權以新嘅性別結婚。有泛民認為門檻應該低啲，例如做咗八成變性手術就可以結婚。甚至有人認為只要心理上變咗性就有權結婚，有可能被濫用作同性婚姻。據聞政府認為即使最終立唔到法，終審法院有關變性人結婚權嘅裁決仍會生效，差別係到時邊啲個案先算變咗性、可以受惠於終院判決結婚，可能又要打過官司先確定到。