中環出更：主持文化館開幕饒宗頤雀躍
國學大師饒宗頤教授以其學術研究聞名於世，亦擅長書畫等藝術領域。饒宗頤文化館尋日慶祝第二期工程竣工，現年九十九歲嘅饒宗頤亦有親自到場主持開幕典禮，卓妮當然有去捧場。雖然饒老大部分時間坐住輪椅，但望落佢仍然非常精神。儀式開始時，饒老喺其他嘉賓攙扶下慢慢企起身，親手將代表文化館嘅圖案貼喺展板上，然後不停向台下來賓致謝，表現得好開心，嘉賓都戥佢高興。
位於荔枝角嘅饒宗頤文化館，佔地三萬二千平方米，前身係荔枝角醫院，之後被古物諮詢委員會評為三級歷史建築，並成為發展局《活化歷史建築夥伴計劃》中嘅首批活化項目，透過展館展出饒老嘅書法同畫作。
二期工程竣工
饒宗頤學術館館長李焯芬教授透露，饒老對北宋著名哲學家周敦頤所寫嘅《愛蓮說》情有獨鍾，所以佢唔少畫作都係以荷花做主題，文化館內其中一幅可以一分為四、又可四而合一嘅《荷花四屏》，就係饒老嘅得意之作。
饒宗頤文化館建築群分上、中、下三區，設有「天光雲影」、舊更亭及古圍牆等景點供訪客參觀。本身係建築師兼畫家嘅立法會前建築界議員劉秀成，就讚揚建築群保存同活化得好好，別具歷史意義。他自己就不時會到訪饒宗頤文化館，教小朋友畫畫同寫生。
商務及經濟發展局前局長馬時亨（肥亨）同前財政司司長梁錦松（阿松）尋日亦有到場，一同欣賞饒老嘅大作同文化館嘅特色建築。肥亨早前猛咁放風，話阿松係下屆特首嘅合適人選，被外界稱作「馬拉松」，搞到阿松多番公開否認都冇人信。阿松尋日笑笑口咁話，兩人相識幾十載，肥亨已經幫佢澄清番，強調唔會因為呢啲事件而影響大家嘅友誼喎。
卓妮