幾經拉鋸，幾經風雨，立法會財委會尋晚仍然未能表決新界東北發展計劃前期工程撥款，意味着這場持久戰將會沒完沒了。點解係持久戰？梗係喇，新界東北發展計劃荊棘滿途，前期工程撥款只係頭一關都搞成咁，前面仲有漫漫長路要行，睇嚟仲有排爭拗，有排亂，有排施放胡椒噴霧吖。
呢，新界東北發展計劃風風雨雨，尋日審議撥款更加係七國咁亂。議會之外，大批示威者集會抗議，又叫囂，又拉橫額，又衝擊議會；議會之內，更加炮聲隆隆，有人拉布，有人抗議，有人動議休會，有人不滿主席剪布，揚言準備提出司法覆核添。你話喇，淨係一筆工程前期撥款啫，已經搞成咁嘅地步，日後成個東北發展計劃又要獲得城規會批准，又要徵地，又要拆遷，過完一關又一關，一關比一關難，要完成建屋大計，簡直難過登天喇！
功夫茶唔係杞人憂天，當局自己都識講，呢筆三億四千萬元工程前期撥款只係部分撥款嘅咋，主體工程最快要等到一八年至開展。正所謂夜長夢多，尤其係港產官僚庸碌無能，撞板多過食飯，情況實在不容樂觀。講真，新界東北發展計劃唔止規模大、諗頭大，更加係爭議大、阻力大，以今屆政府嘅弱勢，要擺平反對聲音，平息社會爭議，談何容易吖。
不妨回顧吓成件事嘅來龍去脈。港府○二年提出新界東北發展計劃，已經授人以柄，被批評「割地賣港」、「打造雙非富豪城」，直至日前向立法會財委會闖關，更加被反對陣營群起攻之，又拉布，又示威，又佔領立法會，吵吵鬧鬧，沒完沒了。開講有話，好嘅開始係成功嘅一半，新界東北發展計劃出師不利，阻力重重，未來一樣崎嶇難行。
見微知著，新界東北發展計劃寸步難行，正正就係香港回歸十七年來紛紛擾擾、一事無成嘅縮影。大家都知道，房屋問題積重難返，唔止影響民生，亦會影響經濟，國際貨幣基金組織日前發出警告，全球樓價不斷上漲已成為經濟穩定嘅重大威脅，尤其香港去年樓價升幅位列全球第二，泡沫爆破危機日甚一日，如果香港再無法擺脫房屋困局，樓市遲早崩圍，七百萬人都冇運行嘅咋！
當然喇，香港問題千頭萬緒，又點止房屋問題棘手吖。講句唔好聽，香港家陣嘅處境可以講係內憂外患，風雨飄搖，社會泛政治化，政改爭拗沒完沒了，反對派要佔領中環，而北大人就話要遏制外部勢力，簡直烽煙四起，再咁落去，結果只能一拍兩散咋，港人自求多福吖！