立法會財務委員會尋日再度開會審議一拖再拖嘅新界東北發展前期工程撥款，為免再重演上次開會遇到示威者衝擊及「佔領」立法會大樓嘅情況，今次秘書處、保安及警方如臨大敵，嚴密布防，除咗大樓部分設施暫停使用外，最礙眼就係門外設置重重嘅鐵馬陣，示威者想衝入去都好難。議員「慢必」陳志全去完荔枝角收押所探望戰友「長毛」梁國雄後有感而發，話立法會大樓更加似一座監獄喎！話說回來，如果唔係上次開會示威者同保安爆發衝突，秘書處又點會咁緊張吖！
