政情：建制搵健波做主將
尋日我哋寫過，無論係政府或建制派內部，都對立法會財務委員會主席吳亮星（星爺）嘅主持會議表現好有意見，覺得佢壓唔到場。根據建制派嘅內部協定，來年財會將改由飲食界張宇人做主持，但最後一年又會輪番到星爺，據聞曾經有人建議換人，由近年對泛民愈鬧愈狠嘅保險界議員陳健波（波哥）頂上。有消息更指出，「操盤人」深感下屆立法會建制派冇乜大將，正力說表現硬淨嘅波哥打消棄選念頭，再做多屆，以便接任財會主席等重要職務。
熟悉議事規則
擁有最多「剪布」經驗嘅立法會主席曾鈺成，早已講明下屆唔再參選，熱門繼任人包括工業（第一）界議員梁君彥同新民黨葉劉淑儀，若然其中一人做咗大會主席，建制派就要搵人接替梁君彥做開嘅內務委員會主席、或葉太做開嘅人事編制小組委員會主席位，繼續為政府保駕護航。財會方面，即使唔計能力，年事已高嘅星爺下屆亦未必再選，令建制派出現「主席荒」。
最近有人留意到，喺○八年首次當選時表現低調嘅波哥，近年愈戰愈勇，多次公開痛斥激進泛民嘅「拉布」同掟嘢搗亂行為。加上佢依家係行政管理委員會成員，熟悉《議事規則》同立法會內部運作，同其他建制派亦關係良好，大家都覺得佢處事公正同有義氣。有人就游說緊佢再做多屆，以便喺下屆立法會接任內會、財會等重要主席位。
唔選勢爆混戰
有關方面盼波哥留任嘅另一原因，係保險界嘅特殊選民結構，同其他工商界別唔同，中資同外資勢力至今喺保險界仍係分庭抗禮，冇任何一方可以話晒事。波哥最初係喺外資保險公司支持下當選，但做落幾年後，依家佢同中方嘅關係亦好好。佢一旦唔選，一定會引發一場中外混戰，最後不知何方勝出，點都唔及波哥做多一屆咁保險。至於本已萌生退意嘅波哥點諗，佢就話唔想講住。