政情：中環出更：入境處球隊大勝「九國聯軍」
我哋早前報道過以美國駐港總領事夏千福為首嘅駐港「小八國聯軍」頻頻落區做親民騷，明寸唔少港府官員淨係識寫網誌做「鍵盤戰士」。風水輪流轉，入境事務處前日趁四年一度世界盃開鑼，率先邀請駐港領事足球隊踢返場友誼波，入境處「一哥」陳國基等高層更親自到銅鑼灣紀律人員體育及康樂會球場打氣，難怪入境處猛將成功以六比二大比數力挫「九國聯軍」，幫港府出番啖氣。
美國領事無上陣
入境處首次對戰駐港領事，包括英國、法國、意大利等九支駐港領事足球勁旅均派出同事迎戰，部分國家更由駐港總領事親自披甲上陣，但平時周圍飲飲食食嘅美國領事隊竟然缺陣。卓妮見領事隊球員高矮肥瘦樣樣有齊，無論隊形同實力都似乎係入境處稍勝，加上主場之利，入境處開場冇耐就先後射入兩球，第三球更加係領事隊擺烏龍將個波送入自己龍門，上半場未完已經拉開至四比○。雖然領事隊其後追番兩球，但都不敵入境處猛烈進攻，最終入境處大勝六比二。
唔似立會搵外援
紀律部隊果然唔同啲，至少對比立法會議員靠晒外援，真係差幾皮。落場打氣嘅陳Sir話，入境處一直都同各國駐港領事保持溝通，好似港人喺外地遇事，入境處都會同當地駐港領事協調，傾開至發現多國領事原來有自組足球隊，決定前日踢番場「微型」世界盃。不過，場波冇陳Sir親自落場似乎欠睇頭，但佢笑言早二十年搵佢或者仲有力踢，呢個年紀先落場盞拖低球隊水平喎。講開足球，唔踢波但都睇開波嘅陳Sir話，今屆會繼續睇好德國捧盃，因多年來撐開德國隊有情意結！但佢自言唔會捱眼瞓睇世盃，仲提醒同事睇波還睇波，唔好影響服務質素至好！
卓妮