相信好多人都識唱呢首歌：「你怕我怕個個怕！煙加酒加屋租加！巴士加的士加多士芝士乜都加……全部要加慘到極，佗累全家，靠份糧點夠食，卒之揸到豉油都冇滴，夠啦啩！夠啦啩！咪枕住加！」歌詞簡單易明，唱出無數基層市民嘅心聲。
光陰似箭，歲月如梭，來到二十一世紀嘅今日，加價狂潮依然困擾港人。呢，港鐵月前先至宣布加價，尋日行會又批准九巴加價啦，新票價將於下月六日起生效，整體加幅三點九個巴仙。雖然乘客平均每程只係畀多幾毫，之但係，小數怕長計吖嘛，家陣衣食住行樣樣加價，九巴舊年已經加過一次，今年再下一城，肯定笑到見牙唔見眼，而升斗市民就百上加斤，愁上加愁。仲有吖，公共事業機構排隊加價，勢必造成骨牌效應，加價潮陸續有來吖。
九巴解釋，受到港鐵競爭，令近十年來累積流失每日五十萬乘客，已經連續兩年錄得虧損，約七成路線虧本，加上薪酬及燃油開支不斷上漲，營運成本上升，令九巴面對重大挑戰，又要提升服務水平同配合港府減排政策，加價都係無可奈何喎。
正所謂，殺頭嘅生意有人做，蝕本嘅生意冇人做，九巴在商言商，加價聽來都好似幾有道理嘅，之不過，小市民就慘咯。嗱，九巴認為客量流失係因為港鐵擴張搶客，年年虧損亦係由港鐵間接造成，爭在未講埋心底嗰句啫：港鐵年年賺大錢都可以繼續加價啦，九巴不過有樣學樣啫。
講開港鐵年年賺錢年年加價，根本係特衰政府一手搞出來嘅，市民同巴士公司都係受害者。當局推動環保，支持鐵路發展，本來就幾好嘅，問題係，港產官僚眼高手低，唔識改善交通規劃，令巴士同鐵路服務互相配合，結果鐵路不斷擴張搶客，搞到巴士公司冇啖好食，咪只好批准佢哋不斷加價，簡直豈有此理！
所以話，港府對公共交通機構監管不力，縱容佢哋不斷加價，再咁落去，畀唔起車錢嘅市民遲早要跑步返工返學都似。
最離譜嘅係，香港唔止車費有加冇減，辦事不力嘅官僚人工都係只加不減，根據最新薪酬調查結果，監管港鐵不力、規劃交通無方嘅運房局局長張炳良有望大幅加薪近六個巴仙。計功夫茶話齋，針拮唔到肉唔知痛，港府應該小試問責牛刀，針對性凍結高官人工，一日未管好公交機構都唔准加，問題或者有希望解決嘅！