政情：鄭志剛：請人首選AQ高
「九十後」經常被批評工作態度消極唔夠進取，又話佢哋視野狹窄，但其實九十後都想知道班僱主心中諗乜。尋日一個大學生實習計劃開幕禮，大會邀請到三位猛人分享職場經驗，好似新世界集團第三代接班人鄭志剛（Adrian）就話，請人最緊要睇「AQ」（逆境智商），因好多年輕人都未試過失敗，故AQ好重要，反而應徵者成績同學歷只係其次。
Adrian又提到，曾經聽同事講，有啲後生仔連影印機都唔識操作，佢亦曾試過同啲青年人傾偈，十個之中只得兩個有睇國際新聞，但對於YouTube等資料就對答如流，仲話近期大熱嘅「厚多士」（好多事）事件都係由佢哋口中得知。
沈祖堯鼓勵學生走出香港
中文大學校長沈祖堯在分享時話，佢鼓勵學生要多走出香港睇吓世界係點，同埋記得要「發大夢」，有學生曾話想去台灣墾丁開餐廳，佢形容呢啲係「小夢」，年輕人應「發大夢」喎。唔知咩先叫做「大夢」呢？