建制派立法會議員被泛民主派議員質疑涉利益衝突時有發生，最近呢股風氣蔓延至區議會層面，好似早前有中西區區議員參與審批撥款時被質疑涉利益衝突。據聞北區區議會對症下藥，明日率先討論收緊審批撥款時利益申報安排，最特別之處係為此設立「三級制」安排。
區議員或增選委員申報利益「三級制」安排將會漸進式收緊，第一級係針對喺團體有不具實務職銜嘅人士，如名譽銜頭、顧問身份等，呢類人士只須喺討論撥款前申報利益，就可參與討論、決議及投票。第二級係針對喺團體具實務職位，如出席正、副主席、秘書等，須申報利益並於討論中保持緘默，而且不可參與該撥款申請決議或投票。
至於第三級就係最緊嘅一級，呢一級就係針對有人係活動嘅負責人或獲授權人士等，呢類人必須申報利益並於討論該項撥款申請時避席，所以沒有投票權。
由於建制派議員於北區區議會係大戶，相信呢個申報利益「三級制」會好大機會獲得通過並落實執行。據理解，其餘區議會將會陸續收緊利益申報制度，避免審批撥款時再出現不必要的爭拗。