政情：今日你上鏡：翟少一身輕陪老友買書

剛卸任監警會主席一職嘅資深大律師翟紹唐（翟少），早前話公職少咗，可以騰出多啲時間陪家人及朋友。點知我哋發現翟少真係得閒咗，有日假期見佢現身金鐘太古廣場一間書店，但佢唔係睇書，而係陪朋友嘅兩個囡囡去買書啫。兩個小朋友企喺字典及工具書一欄前面左揀右揀，對如何寫作及語言教學一類書籍甚感興趣，足足揀咗成十五分鐘咁耐，而翟少就同兩個小朋友嘅爸爸傾偈等候，有講有笑。唔知翟少係咪好欣賞兩個小朋友咁好學，最後仲掏腰包送咗兩本書畀佢哋。