中環出更：政改前夕 譚志源想放大假？
為期五個月嘅政改諮詢已於上月初結束，港府正整理收到十多萬份意見，下月會向特首提交報告，預料到時會有新一輪爭拗。不過，正當政改大戰前夕，政制及內地事務局局長譚志源（Raymond）接受電視訪問時，竟然提到想同太太一齊放一個悠長假期四圍去，包括去非洲睇動物大遷徙及南極等地方，據悉佢之後仲想去埋埃及睇金字塔添。
關鍵時刻 睇怕唔得
根據過去慣例，Raymond都會喺暑假放一、兩星期，但相信時間不足以去南極，有人就講笑話未來係政改討論關鍵時刻，佢想放悠長假期唔係唔得，但只有一個可能性，就係政府對政改達成共識打定輸數，Raymond為推動政改失敗問責辭職，於是乎就可以無乜牽掛離港散心。
不過，講番句公道說話，雖然建制同泛民主派喺特首普選立場仲係「大纜都扯唔埋」，但政府依家仲係未死心，努力尋找政治、法律上都可行嘅方案，所以睇怕Raymond嘅悠長假期夢，要暫時擺埋一邊先嘞！
卓妮