中環出更：零售界暗戰 趙振國 方剛先禮後兵

孫秉樞籲反削個人遊

香港品牌總商會前日喺灣仔會展舉行就職禮，政商界領袖及一眾品牌老闆紛到賀。當方剛遇上趙振國，大方打招呼，但兩人全程未有太多交流，各有各忙。反而「鐘錶大王」孫秉樞就好肉緊捉住方剛隻手「申訴」，叮囑對方反對削減個人遊：「（個人遊）千祈唔好減呀，唔係肯定有十萬人失業，呢次靠你喇！」方剛隨即瞪大對眼，坦言業界近期都閉翳到極，但佢輕拍孫秉樞手背，叫對方放心。

有份撐場嘅「美容教主」鄭明明話，暫未見美容生意受影響，但如果當局一刀切減少個人遊，將牽連多個行業，老闆收入大減，恐會影響打工仔生計。香港品牌總商會副會長陳曼芝就話，歐洲、日本及韓國都千方百計吸引內地旅客，包括提供落地簽證及消費優惠，唔明點解香港有咁好優勢都輕易放棄喎。

零售業重創，孫秉樞（左）及黃業光（右）急急捉住立法會議員鍾國斌（中）度橋救亡。

鄭明明（右）與新華旅遊董事總經理楊章桂芝（左）齊交流創品牌心得。（嚴少阡攝）

胡楚南冀港人善待旅客

早前公布珠寶鐘錶界零售數字大跌四成，商會副會長黃業光坦言，售價五萬元以上嘅貴價錶，近日滯銷，老闆要孭貴租，又要出糧畀夥計，壓力大到透不過氣。「K金大王」胡楚南認為，「微調」個人遊政策未嘗不可，但期望港人善待旅客，創造雙贏。

卓妮