港鐵自詡係一個既安全又快捷嘅集體運輸網絡，呢個簡直係廿一世紀嘅最大笑話。嗱，列車服務頻頻出事，頻頻跪低，玩殘乘客，怨聲載道，如果咁都叫服務快捷，即係瞓天橋底嘅露宿者都可以自稱百萬富翁，你話幾咁荒謬吖。至於安全問題咯喎，港鐵嘅表現同樣令人不敢恭維，撇開列車老化事故頻生唔講，就講金鐘站路基驚現超級裂縫，已經睇到人心驚肉跳喇！
係咁嘅，為配合南港島線（東段）及沙中線工程，金鐘站地底第四及第五層正在趕建「超級轉車站」。本來呢，呢兩條新支線先後爆出延誤醜聞，家陣補鑊趕工唔係壞事，問題係，正當挖掘工程進行得如火如荼之際，上面兩層嘅荃灣線路軌發生恐怖「突變」，固定鋼軌嘅石屎基座驚現六十多處裂縫，部分又長又深，成條蜈蚣咁，而基座嘅預設伸縮縫仲歪歪斜斜，出現移位迹象添，列車隨時出軌，市民唔驚就假。
更令人震驚嘅係，面對列車災難危機，港鐵居然擺出一副闊佬懶理唔嗲唔吊嘅樣子，話裂縫只係一般磨耗情況喎，仲未仔細研究就話唔會影響列車安全。講真，港鐵對待工程延誤醜聞，一向瞞得就瞞，騙得就騙，今次佢哋用相同手法處理路基裂縫危機，一啲都唔令人意外，不過講大話都講得叻啲吖，列車路軌無緣無故出現幾十條裂縫，居然話完全冇事？細路仔都唔信喇。
係人都知，列車路軌唔會無緣無故爆裂，家陣突然裂縫處處，不外乎兩個原因。第一個可能性係路軌老化，正所謂，年紀大，機器壞，荃灣線已經通車四十年，出現老化危機絕對唔出奇，港鐵得過且過，掉以輕心，等如攞乘客嘅安全較飛。至於第二個可能性咯喎，就係受超級轉車站嘅挖掘工程影響，不堪負荷之下路軌被震裂，如果呢個係真相嘅話，情況更加危險，萬一「卟」一聲，成段路軌好似脆麻花咁被震到四分五裂，巨大災難就喺後頭！
沒有最醜，只有更醜。港鐵管治烏煙瘴氣，列車事故頻生、新支線同高鐵工程延誤都未夠，依家仲要爆出路軌裂縫醜聞，真係醜聞如路軌一樣漫長。常言道，千里之堤，潰於蟻穴。港鐵千祈唔好忽視小小嘅裂縫吖，正如專家話齋，奇災巨禍往往就係因為一個毫不起眼嘅紕漏造成，更何況，荃灣線路軌嘅裂縫仲咁誇張添。
講到呢度，功夫茶想到另一單新聞。話說尋日有內地男子聲稱要搵周星馳開戲，佢個尋人紙牌寫住一個數字：250。喺內地，罵人250，即係鬧人低B咁解，按照呢套尋人準則，佢真正要搵嘅人應該係港鐵管理層至啱，本來好好一個鐵路系統，居然畀佢哋搞到唔快捷又唔安全，你話係咪低B吖。
點講都好，千里鐵軌，潰於裂縫，港鐵快快補番呢隻鑊，如果唔係，隨時車毀人亡都有之吖！