立法會工商事務委員會早前決定出訪以色列，聲稱係為咗考察當地點樣推動創新科技發展，但其實喺激進泛民議員拉布下，香港能否順利成立創新及科技局仲係未知之數，議員搶閘出訪以色列，有趁機免費外訪、而且唔貴唔去之嫌。立法會秘書處尋日公布考察團九人名單，發現大部分都係來自工商及專業界功能組別嘅議員，其中公認最有米嘅政團經民聯，更加同時有林健鋒、梁君彥（Andrew）同盧偉國三位代表，佔成個訪問團三分一名額，唔通真係愈有錢嘅人就愈貪錢？
其餘六名團友仲有同樣富貴嘅自由黨鍾國斌，以及五名「中產」議員體文界嘅馬逢國、資訊科技界莫乃光、法律界郭榮鏗、以及民主黨嘅劉慧卿同單仲偕，相對基層草根嘅工聯會、工黨、民建聯、民協同街工等，就一位代表都冇。民建聯蔣麗芸話自己都好想去以色列睇吓，但行程撞正佢陪班九西居民去尼泊爾嘅活動，惟有等下次機會。今次以色列之旅為期六日，每人使費預計要成二萬九千五百元至五萬八千元，不過就可以喺議員嘅個人外訪開支額中扣數，非常抵玩。