籌備十六年嘅西九文化區瀕臨「爛尾」收場，我哋尋日披露當局有意留低三名西九董事局成員，包括盛智文等人預備幫手執爛攤子，不過一波未平一波又起，有泛民主派議員再踢爆西九管理局諮詢會（諮詢會）猶如橡皮圖章，一年先開得個一、兩次會議，連建制派議員都批評諮詢會職權狹窄，無論泛民建制都一致認為，諮詢會應該摺埋，以免浪費時間同金錢。
泛民建制齊轟諮詢會，諮詢會主席梁智仁就認真無辜，因為實情係梁智仁都係去年底先接受委任出任諮詢會主席，因此民主黨劉慧卿特別關心梁智仁時間分配問題，話梁智仁身為醫管局主席，如果要佢兼顧埋諮詢會工作，根本分唔到身。
點知梁智仁一有機會就答得老實不客氣，直言自己接受委任時諗住一年開兩次會，如果真係要擴大諮詢會嘅職權，就要諗下係咪繼續做喎，難怪有人喺事後笑言，「屋漏偏逢連夜雨」呢七個字，或者就係形容西九嘅最佳寫照嘞！