啟晴邨神秘槍擊案震驚全城，兇手當時點解要殺人、用嚟犯案同自殺嗰兩支槍嘅來源，至今仍係一個謎。不過警方今次迅速破案，整體處理手法得宜，相信大部分市民都認同，保安局局長黎棟國亦似因而民望急升。反觀運輸及房屋局處理多項港鐵工程延誤嘅手法，就畀人覺得係拖泥帶水、瞞得就瞞，該局局長張炳良民望自然應聲急跌，與黎棟國此消彼長。
香港研究協會喺上月底至本月初訪問咗過千名市民，要求佢哋對三司十二局問責官員嘅整體表現評分，顯示民望最高嘅繼續係食物及衞生局局長高永文，有成三點六四分。局長之中排第二嘅係黎棟國，有二點八八分，較兩個月前嘅調查爆升咗零點一二分，升幅為眾司局長中最高。
至於之前民望一直唔差嘅張炳良，今次就勁跌零點一一分至二點五四分，明顯係受四月中開始曝光嘅連串鐵路醜聞影響。不過張炳良同長期民望最低嘅發展局局長陳茂波（二點一六分）及教育局局長吳克儉（二點二二分），評分仲有好一段距離，希望佢可以盡快搞番好港鐵呢壇爛攤子喇！