政情：忍光唔忍得 咒人落地獄？
香港電台對政府嚟講一向係燙手山芋，早排港台管理層同港台製作人員工會就檢討《節目製作人員守則》出現分歧，廣播處處長鄧忍光被指要求刪去「促進公共價值、表達自由」等字眼。佢尋日上咗立法會資訊科技及廣播事務委員會解畫，當面同港台工會主席蔡玉玲公開對質，期間鄧忍光更以英文諺語「所有通向地獄的道路，都是由良好意願鋪成」嚟形容工會嘅建議，疑似暗批工會想將全港市民帶落地獄，自然換來泛民議員同工會代表炮轟。
爭拗守則字眼
鄧忍光喺會上指出，喺一○年訂立嘅港台《約章》，已經將港台嘅使命、信念寫晒落去，形同港台嘅憲法，如果將工會提出、並冇喺《約章》提過嘅新字眼，加入等同附屬法例嘅《守則》之內，不但係鹵莽兼冒進嘅行為，仲係有違常識，「理所當然地，一個附屬法例當然不可以超出憲法範圍，這是常識」。蔡玉玲則反駁，《守則》早於九八年面世，質疑管理層做法係先提出新關卡同「搬龍門」。
鄧忍光之後仲未肯收口，笑騎騎咁話：「有一句名言『所有通向地獄的道路，都是由良好意願鋪成』」搞到大家一頭霧水，唔知佢想講乜。其中民主黨議員劉慧卿就質佢，係咪想話啲員工嘅建議，令港台甚至整個香港通往地獄？
博快啲被調走？
有議員話佢英文唔好，就唔好亂拋書包引用英文諺語。有議員更加話佢不但英文唔好，中文更加爛。蔡玉玲就直言對鄧忍光嘅言論，感到既傷心又羞愧。
鄧忍光亂咁點火，連建制派議員都唔敢點撐佢，最後委員會喺泛民支持、建制棄權下通過無約束力嘅動議，促請港台管理層尊重同埋接納員工嘅意見，明落鄧忍光面。不過話說回來，鄧忍光今年九月就任職處長夠三年，根據政務官（AO）傳統夠期可被調走，佢尋日公然同工會反枱開戰，唔知係咪想博快啲畀人調走，離開港台呢個「AO地獄」呢？