中環出更：李梓敬復出 不敵「鋒」芒
自由黨青年團主席李梓敬早前因高調反對全民退休保障，兼公然喺立法會打機，被網民圍剿並被勒令潛水一個月，尋日終於應電台邀請現身，同學民思潮黃之鋒等人同場辯論時事，之不過唔知係咪久休復出未熱身，李梓敬全程畀未夠秤嘅黃之鋒撳住嚟打，認真失威。
同場辯論 全程捱打
黃之鋒尋日多次主動出擊發言，首先指政改唔係只係高官、學者嘅事，香港人都有份，重申佢支持公民提名嘅立場，李梓敬隨即還擊表示唔認同，批評部分激進泛民行動去到咁盡。不過，黃之鋒即時借力打力，重提李梓敬早年曾經絕食抗議當年財政預算案，同自由黨田北俊○三年帶頭辭任行政會議成員，抗議《基本法》第二十三條立法等例子，引證自由黨一樣可以好激。
黃之鋒同李梓敬之後不時你一句我一句，期間黃之鋒不時鐘「叮」李梓敬打斷對方說話，又向李舉牌表示反對，搞到李梓敬多次處於被動狀態，估唔到李梓敬平日出席論壇時牙尖嘴利，今次竟然多次處於下風，認真係風水輪流轉嘞！
卓妮