石湖墟街市 電梯頻停用長者叫苦
近年上水人口急增，作為區內主要購物點的石湖墟街市更見車水馬龍，街市兩組扶手電梯亦日漸耗損，過去一年曾十五次故障，甚至兩梯同壞。專家指街市環境潮濕，會加速電梯損耗，認為當局需適時更換零件，保障市民安全。區議員亦指扶手電梯已使用二十年，不滿當局僅以「頭痛醫頭」方式維修，未有根治問題。
「試過一個禮拜停兩次、又試過連續壞五日、兩條電梯壞晒都試過，仲要整極都仲係壞，搞到啲公公婆婆成日要撐樓梯，好辛苦！」家住上水的呂先生經常到石湖墟街市購物，不滿街市內兩組扶手電梯近年頻頻故障停用，曾於一個月內最少停用五次，亦出現兩部扶手電梯同時故障，「嗰日仲要係年卅晚，最多人買餸做節就嚟壞，好彩冇人受傷，唔係就大件事！」
宜關門後始檢查保養
呂先生又指，上址電梯除頻頻因損壞而停用外，亦多次發現機電工程署於早上及黃昏等繁忙時間停止電梯服務，以進行例檢及保養，「條電梯已經成日壞要停用，都仲要揀啲最多人買餸嘅時間做檢查，計計埋埋變咗隔幾日就停一次咁滯！」呂認為機電署應將例檢及保養時間安排至街市關門後，以減低對市民及商戶造成影響。
機電署建議更換零件
當區區議員王潤強指出，石湖墟街市兩組扶手電梯於九四年隨街市開幕啟用至今，老化問題日見嚴重，當局卻一直未作全面更換，每次損壞僅「小修小補」了事，「一年壞十五次，平均一個月壞多過一次，仲未計維修保養停機嘅次數，唔止影響市民買餸，仲影響商戶生意！」王亦批評機電署於繁忙時間進行例檢做法擾民，要求當局研究改善之策。
卓越培訓發展中心（電機業）總教導員黃啟漢解釋，街市環境較一般商場潮濕，垃圾積水較多，會加速電梯機件損耗，認為當局有必要適時更換零件，以策安全。黃又指晚間進行電梯保養維修所需費用較日間為高，估計當局為節省成本而於街市開放期間例檢，「其實咁對市民同商戶嚟講真係會唔方便，政府唔應該為咗慳錢阻住街市運作！」
機電工程署發言人承認，過去一年街市兩條扶手電梯共有十五次停頓事故，其中九次屬機件故障，該署亦曾於同一個月內進行一次周檢、一次半年檢及一次維修保養。發言人又稱，已按電梯實際運作情況，向食物環境衞生署建議更換所需零件。
記者：楊育輝