小一統一派彩尋日揭盅，各位家長運氣如何吖？功夫茶無寫錯字，今時今日小一學額爭崩頭，學生希望入讀心儀學校，幾乎仲難過中六合彩，與其話係派位，不如話係派彩仲貼切喇！
即係咁，年年派位，年年閉翳，小一派位淪為學額攪珠大抽獎，每年都有大批家長失望而回，淚灑當場，呢啲場面大家都見慣見熟咯。今年最特別嘅係首設「跨境學童專用校網」，本報之前多次提出質疑，認為新措施唔湯唔水，不倫不類，隨時添煩添亂，結果不幸而言中，家陣真係弄巧反拙，搞到家長滿腔怒火，怨聲載道。
所謂跨境學童專用校網，即係拼湊出八個校網，總共提供三千個學額，表面上好似好照顧跨境學生，實際當跨境學生係人球，派位派到冇雷公咁遠，形同流放，唔怨聲四起至奇喇。嗱，尋日有大批雙非家長投訴子女被派往天水圍、屯門，甚至馬鞍山、黃大仙等偏遠地區小學，狠批專用校網只得少量北區學額，對跨境學童不公，揚言會集體投訴，甚至唔排除採取法律行動，挑戰當局嘅派位政策添。
至於本地家長，一樣炮聲隆隆。好似跨境學童重災區之一元朗區咁，家長指摘雙非學童入侵搶佔學額，令當區學生「中籤」機會更加渺茫，而學校被迫加派令每班學生增加，亦有違小班教學原意，擔心影響子女學習，拖低成績，批評專網制度失誤，令本來亂象叢生嘅派位問題雪上加霜。
你話當局係咪唔衰攞嚟衰吖？其實，專網制度有名無實，徒惹民怨，稍為有腦嘅都知行唔通喇。正所謂，不患寡而患不均，今年有一千六百名跨境學童參加專網派位，而獲派北區嘅幸運兒只有大約三百人，其他人點會冇怨氣呢？點會唔投訴呢？教育官僚連咁簡單嘅道理都唔識，自己搬起石頭砸自己嘅腳，智商簡直低過小學生喇！
講到尾，教育局推行專網制度，除咗因為無腦，更加因為無心無肺，長期漠視雙非學童問題，搞到尾大不掉，家陣咪象徵式做啲嘢，當係交差囉。學本地家長話齋，能夠徹底根治雙非學童問題、紓緩小一學額不足嘅有效方法，就係為跨境學童設立專校，譬如話喺深圳或者邊境地區開辦津校或官校，吸納所有雙非兒童，咁就一天光晒喇。功夫茶諗極都唔明，港府又唔係缺錢，又唔係缺師資，點解咁簡單嘅事情都唔肯做呢？唔通真係要等到小學生都搞佔領學校，你哋至肯做嘢？
話時話，小一派位亂象叢生，只係雙非炸彈爆發嘅序幕，其他影響將陸續有來，港府如果仲唔快快拆彈，一切後果自負吖！